Banorët e Paskuqanit bllokojnë Unazën e Madhe, kërkojnë të dinë çdo të ndodhë me shtëpitë e tyre

05.02.2022 | nyje.al

Bllokimi i Unazës së Madhe ishte akti i rradhës i banorëve të Paskuqanit, si mesazh ndaj institucioneve që për një rrugë po i nxjerrin nga shtëpia pa asnjë informacion se çdo të ndodhë me ta.

Policia e Rendit u përpoq të mos lejonte ndalimin e qarkullimit, duke pasur përplasje me banorët. Përpos debateve, forcat policore përdorën dhe forcën për ti shtyrë ata nga rruga.
Projekti i devijuar në Lotin 4 të Unazës së Madhe sjell shembjen e rreth 120 shtëpive në veri të Lumit të Tiranës. Banorët prej vitesh në proces legalizimi kërkojnë të dëmshpërblehen.

Rruga mbeti e bllokuar për më shumë se një orë dhe pati mirëkuptim të drejtuesëve të automjeteve. Banorët, në kërkim të së drejtës, paralajmëruan përshkallëzim të protestave.

04.02.2022 | 18:15

Që prej orës 17:00, banorë të Paskuqanit kanë Unazën e Madhe në kryqëzimin që e lidh atë me Bulevardin e Ri. Projekti i devijuar i Lotit 4, që lidh Shkozën me ish-sheshi Shqiponja sipas banorëve do sjellë shembjen e 120 shtëpive.

Transparencë është ajo çka banorët duan, ata kërkojnë të dinë:

– Pse është devijuar rruga, duke hequr dorë nga hapësira bosh bregut të lumit?

– Pse pas më shumë se 20 vitesh në proces legalizimi, ata kanë marrë vetëm javën e fundit një përgjigje refuzese?

– Si do të dëmshpërblehet mundi i tyre i mbi dy dekadave?

Të bashkuar në një hall, humbja e shtëpive, bashkë me banorët e zonave të tjera përreth Tiranës, protestuesit paralajmëruan përshkallëzim të protestave.