Erinda Isufaj | 11.08.2025 | nyje.al
Tashmë janë bërë tre ditë që një ndër mediumet më të mëdhaja informuese në vend është i fikur. Prej tre ditësh qindra gazetarë, redaktorë dhe teknikë të Fokus Media Group nuk kanë kaluar pragun e redaksive të tyre. Përpara godinave ku ndodhen News24, Panorama, Gazeta Shqiptare dhe BalkanWeb, sot u organizua një protestë jo vetëm për rikthimin e sinjalit televiziv të kësaj media por edhe për të mbrojtur lirinë e mediave në përgjithësi dhe lirinë e shprehjes.
Gazetarë dhe qytetarë u mblodhën pas thirrjes që bëri Asociacioni i Gazetarëve të Shqipërisë (AGSH), duke kërkuar rikthimin e transmetimit dhe fundin e bllokadës policore. “Mos lejoni që të kthehemi në një vend ku lajmet mbyllen me zinxhir,” u shprehën përfaqësuesit e AGSH-së në një nga fjalimet e protestës. Gjatë ditës së sotme në protestën e thirrur nga AGSH përpara godinës së Focus Media Group të pranishëm ishin jo vetëm gazetarë të News24, por edhe përfaqësues të mediave të tjera, aktivistë dhe qytetarë që erdhën për të mbështetur kauzën.
Fjalët që u dëgjuan në shesh ishin të forta dhe direkte: “Mos heshtni, sepse nesër mund të jetë zëri juaj që do të fiket”; “Liria e medias nuk është çështje e një televizioni, por e të gjithë shoqërisë.” Përfaqësues të AGSH-së i bënë thirrje qeverisë dhe institucioneve të pavarura të veprojnë menjëherë. Ata paralajmëruan se protesta do të vazhdojë dhe do të marrë forma të tjera deri në rikthimin e sinjalit dhe funksionimit normal të redaksive.
Një reagim tjetër erdhi dhe nga Ina Zhupa, kryetare e Komisionit të Medias dhe deputete e PD, e cila e quajti këtë “një ditë të trishtë për mediat” dhe premtoi se do ta ngrejë çështjen në AMA dhe në Kuvend. Për gazetarët e pranishëm në protestë, kjo nuk është një betejë që përfundon sot. Ata e shohin si fillimin e një lëvizjeje për të mbrojtur standardet e medias dhe për të garantuar që, pavarësisht konflikteve të biznesit apo interesave politike, e drejta për të informuar nuk do të shkelet më.
Tre ditë tension
Ngjarja shpërtheu më 9 gusht, kur pa asnjë paralajmërim publik, policia vendosi një kordon sigurie rreth Focus Media Group dhe sinjali i News24 u ndërpre. Asnjë shpjegim i detajuar nuk u jepet gazetarëve apo publikut. Sipas burimeve zyrtare, ndërhyrja lidhet me një konflikt tregtar mes pronarit të mediave dhe kompanisë shtetërore të armëve “KAYO sh.a.”. Mirëpo gazetarët e shohin këtë si një veprim arbitrar që prek një nga shtyllat e demokracisë: lirinë e medias. Reagimi i parë erdhi nga gazetarët që nisin të publikojnë në rrjete sociale foto dhe video të kordonit policor. Ola Mitre (ish-punonjëse) shkruajti: “Ajo që po ndodh është një goditje e drejtpërdrejtë e të drejtave të gazetarëve… Nuk e mendoja kurrë se do kisha një foto me policë në sfond në vendin ku kam dhënë 7 vite të jetës sime.”
Një ditë më pas me datë 10 gusht, Asociacioni i Gazetarëve të Shqipërisë (AGSH) i dërgoi një letër komunitetit ndërkombëtar, ku theksoi:
“Ky precedent paraqet një rrezik serioz për lirinë e medias dhe krijon një atmosferë frike tek gazetarët dhe publiku. Ne theksojmë se, pavarësisht qëndrimeve editoriale apo çështjeve të brendshme të çdo mediaje, sulme të tilla ndaj funksionimit normal të redaksive dëmtojnë themelet e demokracisë dhe të drejtës së publikut për t’u informuar.”
Letra u shoqërua nga reagime të menjëhershme ndërkombëtare:
EFJ ( Federata Evropiane e Gazetarëve), AEJ Albania (Shoqata e Gazetarëve Evropianë), APJ Albania (Shoqata e Gazetarëve Profesionistë) dhe SafeJournalists publikuan mesazhe mbështetjeje dhe kërkuan zgjidhje urgjente.
Gjatë këtyre tre ditëve, rrjetet sociale janë kthyer në tribunë të lirisë së fjalës. Gazetarët e News dhe media të tjera kanë shprehur indinjatën e tyre. Osman Stafa, gazetar i News24, theksoi: “Gazetari nuk ka armë në dorë, por mikrofon. Sot janë penguar 230 punonjës që të bëjnë punën e tyre.” Klodiana Lala, gazetarja investigative, paralajmëroi: “Nëse sot është radha e News24, nesër mund të jetë çdo media tjetër. Askush nuk është i sigurt.” Ndërsa Anila Jole, drejtoresha e informacionit të News24, deklaroi për BalkanWeb: “E gjithë media shqiptare e ka mbështetur News24. Kam besim se ne do të rikthehemi.”
Në të njëjtën kohë, portale dhe media të tjera si Reporter.al publikuan kronologjinë e bllokadës, duke theksuar mungesën e transparencës nga autoritetet dhe mosdhënien e një urdhri të qartë ligjor për ndërprerjen e sinjalit. BalkanWeb vazhdon gjithashtu të jetë aktiv me shkrime dhe të rejat e fundit nëpërmjet portalit online.
Tre ditë pa zërin mediatik të kësaj mediaje mund të duken pak. Por për një vend që pretendon të jetë demokratik, janë një goditje e drejtpërdrejtë ndaj fjalës së lirë.
