Fotografi

Protesta e radhës për bllokimin e rrugës në Thumanë, institucionet heshtin

20.08.2024

Mbrëmjen e sotme u mbajt protesta e radhës e banorëve të Thumanës, Krujës e Fushë-Krujës kundër ndalimit të lëvizjes të shkaktuar prej aksit Thumanë-Kashar. Ndonëse kjo e sotmja ishte protesta e shtatë e banorëve, nga institucionet nuk ka pasur asnjë përgjigje për kërkesat e ngritura.

Ashtu si në të mëparshmet, edhe në këtë protestë banorët bllokuan aksin e ri për gati një orë. Policia e Shtetit me afrimin e orës 20:00 liroi rrugën duke përdorur forcën dhe shtyrë protestuesit. “Shtyni, shtyni” – dëgjohej të thërriste drejt policëve Drejtori i Policisë Tiranë Tonin Vocaj teksa ata përpiqeshin të largonin banorët që u ulën në rrugë.

Pasi policia ia doli të largojë banorët nga aksi Thumanë-Kashar, ata bllokuan kryqëzimin e Thumanës në aksin e vjetër. Protestat do të vazhdojnë derisa kërkesa e tyre, për hyrje-dalje në Thumanë në aksin e ri, të plotësohet dhe derisa institucionet të përgjigjen u shprehën ata.

Kundër gangove me pushtet

19.08.2024

Për të kërkuar drejtësi për Eglantin Progën sot në mbrëmje marshuan me qindra qytetar për tek Kryeministria. Shteti, i kapur prej gangsterëve, është fajtor kryesor për humbjen e jetës jo vetëm të Eglantinit por edhe shumë qytetarëve të tjerë, thërritën protestuesit, duke kërkuar fundin e tij.

Familjarët e të ndjerit ishin të pranishëm në marshim dhe përmes zërit që i dridhej por të vendosur të së motrës Jonida Proga, ata kërkuan drejtësi me vepra. Shkarkimi i Drejtorit të Përgjithshëm të Policisë së Shtetit dhe drejtorit të Spitalit Pogradec ishte një kërkesë e thirrur nga Jonida. Gjithashtu, arrestimi i bashkëpuntorëve dhe ndryshimi i akuzës është një kërkesë e menjëhershme e familjarëve.

Qytetarët shprehën me thirrje e pankarta që beteja për drejtësi nuk mbaron. Po ashtu edhe synimi i tyre për të krijuar një shoqëri që qeveriset denjësisht e jo nga gangsterët, siç ka ndodhur prej më shumë se tre dekadash.

Banorët në protestë: Thumanë-Kashar me një dalje është fashizëm

17.08.2024

Mbrëmjen e djeshme u mbajt protesta e gjashtë e banorëve të Thumanës, Krujës e Fushë-Krujës kundër bllokimit të lidhjes së aksit të përdorur më parë me Rugën e Kombit. Bllokim që erdhi pas ndërtimit të rrugës Thumanë – Kashar duke mos respektuar projektin parësor të investimit që parashikonte dalje për Fushë-Krujën dhe Thumanën.

Ashtu si në protestat e mëhershme banorët bllokuan aksin e ri rrugor për një orë duke mos u ndeshur me shumë kundërshti nga forcat e rendit, të cilët ishin të shumtë të pranishëm. Me afrimin e orës 20:00 forcat policore nisën të shtyjnë banorët për të liruar rrugën por pas resiztencës së tyre, efektivët përdorën forcë fizike dhe gaz lotësjellës për t’i shpërndarë protestuesit. Ndër ta pati shumë të lënduar prej hedhjes së gazit drejtëpërdrejtë në fytyrë duke shkaktuar irritim të lartë.

Ramiz Pasha, banor protestues mori megafonin dhe u shpreh: “Sot gjoja demokraci. Absurditet! Absurditet! Ky është fashizëm, nazizëm, që se ka parë Shqipëria në jetë të jetëve. Edi Rama, Bashkim Ulaj, […] e kanë blloku rrugën e gjithë Shqipërisë sot, e ka fut gjithë Shqipërinë në kaos. Haram u qoftë buka që ua ka dhënë kjo tokë. U bëj thirrje dhe shokëve të Policisë. Është e pamundur të hani bukën e turpit, për një rrugë që nuk u del as me mbajt frymën. Dorëzojeni mor atë dreq kapele se nuk ju hy në punë. Rruga do të jetë nesër më shumë për ju se për mu, unë kam hik në botën tjetër, po ju do ta vuni me soj e sorrollup.”

Pas dëbimit të forcave policore nga aksi Thumanë-Kashar, protestuesit bllokuan për pak minuta daljen e Thumanës në aksin e vjetër. Aty u vendos edhe për protestën e radhës që do të mbahet të martën, më 20 gusht.

#duatëvotoj

18.07.2024

Pasditja e sotme shënoi protestën për të drejtën e votës së shqiptarëve nga diaspora. Pas nismave të vazhdueshme që prej vitit 2020 të grupimit “Diaspora për Shqipërinë e Lirë” të përbërë dhe mbështetur kryesisht nga emigrantët shqiptarë të nga vende të ndryshme të diasporës, me 9 dhjetor 2022 Gjykata Kushtetuese publikoi vendimin e saj ku thuhej se konstatonte cënim të së drejtës kushtetuese të votës së emigrantëve dhe detyrimin e Kuvendit për plotësimin e boshllëkut ligjor brenda një viti nga hyrja në fuqi e këtij vendimi. Afati i miratimit të këtij projektligji tashmë ka kaluar dhe në parlament ende nuk është marrë asnjë vendim, që do të thotë se nëse sesioni parlamentar mbyllet pa u miratuar kuadri ligjor, diaspora nuk do mundet të votojë as në zgjedhjet e ardhshme të vitit 2025. Kjo ka sjellë rritjen e presionit të aktivistëve të kësaj nisme, të cilët janë përkrahur edhe nga qytetarë të grupimeve të tjera. Të mbledhur para parlamentit me pankarta të shumta dhe me banderolën #duatëvotoj2025, protestuesit e nisën protestën me fjalime ku kërkuan sa më shpejt mundësiminin e votës së diasporës.

Pas përfundimit të fjalimeve, protestuesit të vendosur për t’i dhënë zë protestës së tyre, tentuan të çajnë përmes trupave policorë të cilët ishin vendosur në mbrojtje të hyrjeve parlamentare. Synimi i protestuesve ishte që të mos lejonin deputetet të dilnin nga salla e parlamentit pa miratuar projektligjin për votën e diasporës.

Kruščica për Shushicën

13.07.2024

Fushata në mbrojtje të Shushicës pati dje aksionin komunitar të radhës. Banorë të fshatrave të prekura nga projekti infrastrukturor, bashkë me gratë e Kruščicës nga Bosnja Hercegovina, si dhe aktivistë e gazetarë, përfaqësues të organizatave dhe avokatë të përfshirë në çështje ligjore-mjedisore shpalosën edhe njëherë parullën “Save our Shushica”.

Thirrja për mbrojtjen e një prej degëve të Vjosës, pjesë e Parkut Kombëtar shpallur në vitin 2023, vjen prej rrezikut real që po i kanoset këtij burimi prej ndërtimit të rrjetit të ujësjellësit për qytetin e Himarës. Banorët e 37 fshatrave të prekur nga ky projekt prej muajsh dhe në mënyra të ndryshme e kanë kundërshtuar atë duke argumentuar që pasojat për jetën e tyre, për lumin dhe për florën e faunën do të ishin të pakthyeshme dhe aspak të justifikueshme. Revolta e banorëve është e madhe teksa shtrojnë se projekti është investim kryesisht për turizmin masiv, duke përjashtuar nevojat e komunitetit lokal dhe mundësitë e zhvillimit të turizmit të qëndrueshëm.

Në shenjë solidariteti, dhe për të treguar që çështja e lumit është jetike, po aq edhe një ndër përbashkuesit më të fortë të rezistencave në rajon e kudo në botë, gratë e guximshme të Kruščicës iu bashkuan dje banorëve të Kuçit dhe Brataj. Të dalluara ndërkombëtarisht për vendosmërinë e tyre duke bllokuar për më shumë se 300 ditë terrenin për ndërtimin e hec-it në fshatin e tyre, gratë e Kruščicës janë bërë simbol rezistence për ujin, lumin dhe të mirat e përbashkëta. Ato i komunikuan banorëve rëndësinë e rezistencës, duke ftuar gratë e zonës për t’u bashkuar edhe më shumë në numër në krah të burimit të Shushicës.

"Vend krimi", qytetarët skuqin Ministrinë e Shëndetësisë

01.07.2024

Qytetarët u rikthyen mbrëmjen e sotme para Ministrisë së Shëndetësisë për të kërkuar mbajtjen e përgjegjësisë nga e gjithë hallka e sistemit shëndetësor dhe dënimin e kujtdo të përfshirë në skandalin e pavionit të onkologjisë në QSUT.

Çrrënjosja e kulturës së korrupsionit nga spitali ishte thirrja e kryesore e protestuesëve. Proces ky që sipas tyre arrihet vetëm përmes dënimit të merituar për secilin mjek e infermier a drejtor e ministër që për 30 vite me veprimet a mos veprimet e tyre kanë vrarë të pamundurit që shkelën në dyert e spitaleve. Protestuesit ngritën shqetësimin për fjalimin e kryeministrit Rama në atë që e quajtën “performancë të Naltmadhnisë”, takimin me mjekët e QSUT-së ku kreu i qeverisë risolli leksionin e tij mbi mëvetësinë e përgjegjësisë.

Protesta e organizuar në rrjetet sociale sipas pjesëmarrësve duhet dhe do të vijojë e përmes po rrjeteve sociale do të njoftohet rikthimi përmballë ministrisë.

Ministria e Vdekjes

26.06.2024

Skandali i mjekëve dhe specialistëve të Onkologjikut të cilët janë akuzuar për shpërdorim detyre ndaj pacientëve me sëmundje terminale ka ngritur në këmbë mbarë opinionin publik. Qytetarë të shumtë u mblodhën sot përpara Ministrisë së Shëndetësisë për të dënuar ashpër atë çka është raportuar në media. Të revoltuar dhe me histori personale të shumta për të rrëfyer, qytetarët kërkuan burgim për mjekët të cilëve u janë komunikuar masat e sigurisë.

Policia ndalon aksionin qytetar kundër aktivitetit të ambasadës së Izraelit

11.06.2024

Ndonëse Izraeli çdo ditë që kalon bombardon Gazën dhe vazhdon sulmin gjenocidal mbi palestinezët, Ministria e Ekonomisë, Kulturës dhe Inovacionit (MEKI) në Shqipëri nuk u tërhoq nga organizimet e Javës Kulturore të këtij shteti. Letra e hapur e firmosur nga më shumë se 700 qytetarë të përfshirë a të interesuar në fushën e artit dhe kulturës për t’i ndalur këto aktivitete ra në vesh të shurdhër të institucioneve.

Ditën e djeshme, Kolektivi Palestina e Lirë njoftuan zhvillimin e një aksioni në hyrjen e ArTurbinës me thirrje kryesore bojkotimin e aktiviteteve, specifikisht në rastin e mbrëmshëm, një shfaqje kërcimi bashkëkohor. Të paktë në numër, me dy pankarta në duar dhe shaje e flamuj palestinezë, pjesëmarrësit nuk u lejuan të qëndrojnë në hyrje të godinës apo kudo nga ku shihej ajo.

Perimetri i sigurisë qe i pa caktuar nga forcat policore dhe thirrja nga një prej efektivëve ishte për të shkuar “sa më larg teatrit”.

Karnavalet e Bozovcës

08.05.2024

Në kohën kur karnavalet na shpërfaqen me maskat veneciane, me ngjyra e xixa, në Bozovcë ende mund të shohim kremtimin e karnavaleve në një mënyrë më autentike në thelb e kuptim, të njohura ndryshe edhe si Karnavalet Ilire në Tetovë.

Bozovca është fshati më i thellë i malësisë së Sharrit, pjesë e qytetit të Tetovës. Majat e Sharrit të shtrira përreth, nuk të lënë pa të bërë përshtypje, duke i dhënë hijeshi të pamasë fshatit. Rrugës duke shkuar drejt tij, përveç luleve të shumëllojta çelur arave, sildomos atyre të qershive, hasje dhe me plot bagëti si kuaj, lopë e dele liruar rrugëve e lëndinave. Në një fshat të tillë ku blegtoria është pikë kyçe e ekonomisë së fshatit, s’ka si të mos jetë themel edhe i këtyre karvanavele që kjo zonë feston. Maskat prej lëkurëve të kafshëve, gëzofi, guna, këmboret janë dekori kryesor i karnavalistëve.

"Liri, liri! Liri për Palestinën!"

04.05.2024

Qindra qytetarë dhe aktivistë u tubuan sot pasdite në sheshin “Skënderbej” për të shprehur solidaritet me popullin e Palestinës. Përmes pankartave, thirrjeve dhe simbolikave të tjera ata iu bashkuan thirrjes globale për armëpushim dhe ndalim të ushtrimit të gjenocidit mbi popullin në Gaza. Rezistenca e studentëve në Amerikë dhe kudo u përshëndet nga folësit, të cilët nga ana tjetër dënuan mungesën e reagimit, kryesisht mediatik, në vendin tonë.

1 maji i protestave, punëtorët shqiptarë përballë institucioneve

01.05.2024

Dita e punëtorëve nisi sot me protestën e mësuesëve para Ministrisë së Arsimit dhe Sporteve. Dy prej sindikatave të arsimtarëve i shkuan në derë ministres Manastirliu dhe parashtruan kërkesat e tyre, ndër të tjera dhe më themelorja për ta mbetet thirrja për rritjen e buxhetit për arsimin në 5%. Kjo rritje e buxhetit që do sillte plotësimin e një sërë kërkesash të ngritura sot nga mësuesit, ka qenë premtim i qeverisë Rama në të tre fushatat para-zgjedhore por nuk është zbatuar kurrë sipas arsimtarëve para-universitarë.

Mësuesit u rikthyen në sheshin “Skënderbej”, aty ku ishin mbledhur, pas marshimit dhe protestës tek Ministria. Po në sheshin “Skënderbej”, në ora 10:00 u mblodhën ish-minatorët që thirrën edhe njëherë për miratimin e Statusit të Minatorit, parashikim ligjor që është premtuar prej vitesh nga politikanët dhe gjithashtu një peticion është paraqitur në Kuvend në dhjetor të vitit 2020 i cili nuk është marrë në shqyrtim.

Me mbërritjen tek Kryeministria pas marshimit, ish-minatorët kërkuan miratimin e Statusit njëherë e më parë në mënyrë që ta gëzojnë para se të jetë shumë vonë për ta, ashtu siç ka ndodhur me shumë prej shokëve të tyre. Në kushtet e tanishme, jetesa është e pamundur për ish-minatorët që u shprehën se pensioni mujor që marrin nuk del as për ilaçet që u duhen për kurimin e sëmundjeve profesionale që bartin ndër vite.

Punonjës të “call center”-ave dhe profesionistë të tjerë u bashkuan përpara Kryeminstrisë në orën 11:00 duke bërë thirrje për dinjitet në punë. Në komunikatën e mbajtur, Unioni i Sindikatave dhe Koalicioni Shqiptar për të Drejtat në Punë bënë thirrje për veprim të menjëhershëm nga institucionet për të garantuar paga dhe kushte më të mira në punë, për parandalimin e shfrytëzimit e nëpërkëmbjes të punëtorëve dhe mohimit të të drejtave të tyre.

Nata është e jona! Poshtë Patriarkati!

09.03.2024

“Nata është e jona! Poshtë Patriarkati!” ishte thirrja që kumbonte në “Qytetin Studenti” mbrëmjen e kaluar, një prej zonave të Tiranës ku vajza e gra, studente e punëtore, qarkullojnë përditë nën dritën e diellit por edhe nën errësirën e natës. Të përballura me rreziqet që nga sulmet prej qenve endacakë tek ndjesia e përndjekjes a përndjekja e qenësishme që më së paku prafullon zemrat e vajzave dhe grave. Ashtu si në “Qytetin Studenti” janë me dhjetra rrugë të Tiranës që janë të pasigurta për banueset e saj.

Për të denoncuar këtë gjendje sulmi të çdonatshëm të grave dhe vajzave Kolektivi Feminist në Shqipëri këtë vit organizoi një marshim me lajtmotivin “Nata është e jona.”

Zonat e mbrojtura nxirren zbuluar për oligarkët

22.02.2024

Vetëm 110 sekonda u deshën për zhbërjen e zonave të mbrojtura dhe kthimin e tyre në kantiere ndërtimi për investitorët strategjikë. Tashmë zonat e mbrojtura e humbasin statusin në disa pjesë të tyre me një firmë nga Kryeministri Rama, si kryetar i Këshillit Kombëtar të Territorit.

Aktivistët u shprehën se ndryshimet e trumbetuara si përgjigje ndaj kërkesave që vinin nga banorët dhe qeveria lokale nuk do të sjellin zhvillim por shkatërrim të pasurive tona natyrore. Sipas studiuesit Aleksandër Trajçe dhe drejtuesit të një prej organizatave mjedisore më të zëshme kundër ndryshimit të ligjit PPNEA këto ndryshime i hapin rrugë investitorëve të preferuar të pushtetit, të cilët do t’i kthejnë këto zona në mundësi përfitimi personale dhe do t’i shndërrojnë ato në hapësira ekskluzive.

Ndër protestues pati edhe nga ata që akuzuan qeverinë si vegël të oligarkëve, që vendimet e saj lindin prej tyre dhe miratohen për ta. Edhe projektligji i miratuar sot për ndryshimin e ligjit “Për zonat e mbrojtura”, u shpreh një prej protestuesve, është një projektligj që është hartuar prej oligarkëve dhe do të jetë në shërbim të Zamir Manes, Shefqet Kastratit dhe Gjergj Lucës.

“77 vota pro, asnjë kundër, asnjë abstenim. Miratohet.”

22.02.2024

Lindita Nikolla, kryetare e Kuvendit të Shqipërisë njoftoi ratifikimin e protokollit për forcimin e bashkëpunimit në fushën e migracionit mes Italisë dhe Shqipërisë. Kartonët e kuq me arsyet pse kjo marrëveshje nuk duhej miratuar, dorëzuar tek deputetët para seancës plenare nga aktivistet Arilda Lleshi dhe Kristina Millona duket të mos jenë përfillur aspak nga deputetët e Kuvendit të Shqipërisë. Para miratimit të protokollit nuk pati asnjë diskutim në Kuvend, deputët e pozitës ngritën kartonët jeshilë dhe brenda pesë minutave kaluan tre projektligje të rendit të ditës ndërsa ata të opozitës zunë foltoren dhe u ngritën në këmbë por pa ndryshuar asgjë në vazhdimësinë e seancës plenare.

Ratifikimi, pa diskutime dhe krejtësisht i pa kërcënuar nga kartonët e kuq pritej nga aktivistet që zhvilluan aksionin në hyrje të Kuvendit mëngjesin e sotëm. “Sigurisht, është një aksion simbolik sepse e dimë, e parashikojmë ratifikimin e marrëveshjes. Por, gjithsesi rezistenca nuk do ndalet këtu. Ne do të përpiqemi të krijojmë një grup aktivistësh, grupe pune që do të vendosen pranë këtyre qendrave për të monitoruar situatën brenda kampeve.” – u shpreh Kristina Millona.

Për aktivistet ishte e vështirë identifikimi i deputetëve pasi prezenca e tyre në Kuvend dhe ngritja e zërit për komunitetet që përfaqësojnë mungon në shumicën e tyre.

Për qumështin dhe mishin, blegtorët në protestë

01.02.2024

Blegtorët e zonës së Gjirokastrës janë rikthyer në protestë ditën e sotme. Ata parashtruan katër kërkesat drejtuar Ministrisë së Bujqësisë dhe Zhvillimit Rural, rritjen e çmimit të qumështit, rritjen e çmimit të mishit, dyfishimin e subvencionimit për blegtorët dhe rritja e periudhës së certifikimit të kullotave.

Ministria ka njoftuar përmes Bashkisë Gjirokastër mbajtjen e një takimi në orën 14:00 dhe blegtorët presin mbërritjen e ministres Denaj. Pjesëmarrësit në protestë shprehen se do ta bojkotojnë takimin nëse nuk e lejojnë median të marrë pjesë, ashtu siç përflitet të jetë vendosur nga Ministria. Ministret Kumbaro dhe Denaj pak minuta më parë bënë një ndalesë në Urën e Kardhiqit, ku po protestohet nga blegtorët, për ti respektuar ata – siç përmenden ato – dhe pastaj do të kthehen në takimin e programuar.

Në fjalët e tyre, blegtorët bën thirrje gjithashtu për ndalimin e presioneve që iu janë bërë vazhdimisht, me heqjen e certifikimit të kullotave apo pushimin nga puna të familjarëve.

Kushtetuesja "vdiq", aprovoi marrëveshjen Rama-Meloni

29.01.2024

Aktivistët që kanë protestuar në hyrje të Gjykatës Kushtetuese në çdo seancë shqyrtimi të marrëveshjes protokoll “Për Forcimin e Bashkëpunimit në Fushën e Migracionit”, sot pasdite vendosën lule dhe kryen “homazhe” në dyert e këtij institucioni të drejtësisë. Ky akt simbolik revolte dhe indinjate nga aktivistët, erdhi pas vendimit të marrë nga kjo gjykatë, i cili e deklaroi marrëveshjen Rama-Meloni si kushtetuese duke i hapur rrugë ratifikimit të saj në Parlament.

“Sot ishte dita e tretë që ne protestuam para Gjykatës dhe sapo morëm vesh vendimin erdhëm për të vendosur një kurorë. Ishte shpresa jonë e fundit, ishte i vetmi institucion që mund të garantonte kushtetueshmërinë dhe demokracinë në këtë vend. Ne sot ndihemi si fëmijë jetimë në mes të katër rrugëve, nuk dimë më se cili institucion na mbron. Jemi zyrtarisht nën autokracinë e një partie, e një personi.”- u shpreh Arilda Lleshi, aktiviste.

Armëpushim tani! Në Tiranë marshohet për ndalimin e pushtimit të Palestinës

13.01.2024

Qytetarë, aktivistë dhe shtetas te huaj morën pjesë sot në një marshim solidarizues me popullin e Palestinës, me thirrjen globale: Armëpushim tani! Në komunikatën e mbajtur iu bë thirrje qeverisë të shkëpusë marrëdhëniet diplomatike me shtetin e Izraelit dhe marrëveshjet ushtarake mes dy vendeve. Gjithashtu, protestuesit bënë thirrje për mbështetje qytetare dhe presion publik ndaj qeverisë për qëndrime humane në organizmat ndërkombëtarë.

Me pankarta në duar, flamuj të Palestinës dhe thirrje, protestuesit marshuan nga Sheshi “Nënë Tereza”, drejt Ambasadës Izraelite dhe mbajtën fjalët në Sheshin “Skënderbej”.

“S’është konflikt, s’është as luftë. Ky është genocid.” – u thërrit në masë nga protestuesit në ballë të ambasadës Izraelite, shtetit që tashmë është akuzuar në Gjykatën Ndërkombëtare të Drejtësisë nga Konventa për Parandalim dhe Ndëshkim të Krimeve të Gjenocidit në Rripin e Gazës.

Bullizmi u denoncua, shteti heshti

06.01.2024

Vetëvrasja e 41-vjeçares Bedrie Loka, shkaktuar nga dhuna psikologjike e shantazhi i vazhdueshëm në rrjete sociale dhe nga familjarë që vinin në dyshim nderin e saj, ka prekur opinion publik në masë. Ditën e djeshme u njoftua një protestë në sheshin “Nënë Tereza” në Tiranë dhe paraditen e sotme qytetarë dhe aktivistë mbajtën fjalët e tyre para medias.

Bedrie Loka kishte denoncuar në Policinë e Durrësit, dhjetorin e vitit 2022, hapjen e një llogarie në rrjete sociale me emrin e saj por pas referimit të materialeve në Prokurori, çështja nuk ka ecur përpara duke i hapur rrugë shantazhit të vazhduar.

Banorët e Kamzës bllokojnë bulevardin kryesor në shenjë revolte ndaj SHPRESA AL

Qindra qytetarë të Kamzës, pasi kanë pritur në radhë të gjata që prej orës 5 të mëngjesit kanë protestuar në bulevardin kryesor të qytetit pasi janë njoftuar pas 4 orësh pritje se abonetë e transportit publik nuk do të shiten as ditën e sotme. Të revoltuar nga trajtimi i padrejtë, tallës e thuajse çnjerëzor nga përfaqësuesit e kompanisë së shërbimit të transportit SHPRESA Al kanë bllokuar lëvizjen e urbanëve. Të mbajtur pezull për ditë të tëra dhe në radhë të gjata që ndjellin konflikte të atypëratyshme edhe mes atyre që presin, kanë vendosur ashtu të shumtë të protestojnë deri në momentin që do të shtinin në dorë abonetë e muajit janar.

Nuk dua të mbes pa e parë “Nuk dua të vdes e virgjër”

Përmes shfaqjes dhe pamundësisë së saj për ta ndjekur, Suela thërret për gjithëpërfshirje dhe zhdukjen e pengesave, jo vetëm infrastrukturore, në mënyrë që personat me aftësi të kufizuar të shijojnë artin, kulturën, politikën, demokracinë dhe çdo aspekt tjetër të shoqërisë.

“Unë uroj që Bashkia Kamëz, nëpërmjet kësaj shfaqjeje, të ndërgjegjësohet që ka nevojë për më shumë akses për personat me aftësi të kufizuara, jo vetëm në objektet kulturore, por kudo, në rrugë, në trotuar, në transport, kudo ku ka nevojë për askes, që personat me aftësi të kufizuara të jenë më të dukshëm dhe të marrin më shumë pjesë në shoqëri.”

Historia e Bernardës ngërtheu shikuesit dhe fitoi duartrokitje dhe ovacione nga të rinjtë dhe të rejat e Kamzës dhe unë dola më shpresën që ata, kur të hedhin hapin jashtë asaj salle të duan të kthehen përsëri dhe gjithashtu të ndjejnë nevojën për të respektuar dhe për t’u solidarizuar me secilën vajzë a djalë me aftësi të kufizuar që kanë në rrethin e tyre.

Studentët e mjekësisë kundërshtojnë 5 vjeçarin me detyrim

Studentët e degës së mjekësisë së përgjithshme marshuan të shumtë sot nga fakulteti i tyre drejt Ministrisë së Arsimit dhe Sporteve. Prej ditësh ata kundërshtojnë propozimin e dy ministrive, të Arsimit dhe të Shëndetësisë, mbi detyrimin për të punuar për tre vite radhazi pas përfundimit të studimeve, në të kundërt rritjen e tarifës universitare në shifrën prej 5000 eurosh. Studentët pohojnë se propozimi ministror cënon haptazi të drejtën e tyre për studime, për të zgjedhur lirisht ushtrimin e profesionit, si dhe mbart nota imponuese dhe presioni kundrejt tyre. Ata bëjnë me dije se janë njoftuar së fundmi për faktin që Ministria e Arsimit bashkë me Ministrinë e Shëndetësisë dhe Rektoratin e Universitetit po hartojnë një draft-propozim që i vë studentët e degës Mjekësi e Përgjithshme të Fakultetit të Mjekësisë përballë dy zgjedhjeve të detyruara: ose të pranojnë të punojnë si mjekë të përgjithshëm për tre vite me radhë pas përfundimit të studimeve ose në të kundërt u duhet të paguajnë një tarifë studimi prej 5000 euro. Kjo tarifë, sipas studentëve e rrit 13 herë tarifën e studimit krahasur me atë çka paguajnë aktualisht, kosto e cila edhe aq sa është mbetet ndër më të lartat ndër fakultete, pohojnë ata.

Grupi Ata në Kamëz: Shumë gra i kemi humbur. Por, kemi edhe shumë gra për të ruajtur

E mërkura tronditi qytetin e Kamzës edhe gjithë Shqipërinë me ngjarjen makabre që solli humbjen e jetëve të tre grave. Mevlute Hysa, Hasime Dafku, Etleva Kurti u vranë më 1 mars në Kamëz nga Dan Hutra, i dënuar për dhunë në familje, vrasje, pengmarrje dhe grabitje. Ai u la i lirë më 16 shkurt pas tetë muajsh i arrestuar për dhunën e ushtruar ndaj Elena Hysës, ish-bashkëjetuesja e tij që mbeti e plagosur në sulmin e të mërkurës.

Për aktivistet/ët e Grupit Ata në Kamëz, ky akt i radhës i femicidit ka sjellë zi e vaj në qytet. Ata shpalosën ditën e djeshme një banderolë me mbishkrimin “Kamza në zi për gratë”. Nëpërmjet një postimi në rrjetet sociale gjithashtu përcollën reagimin e tyre mbi këtë terror dhe akuzuan shtetin me instituticionet e tij si monopol të dhunës dhe kontrollit.

Rindërtimi si dhuratë, pa pretendime mbi të

Kanë kaluar tre vite që prej fatkeqësisë natyrore të tërmetit, që ngjau më 26 nëntor 2019, dhe ndryshe nga çfarë propagandohet ditë për ditë nga rrjetet sociale të pushtetit, shumë banorë janë ende të parehatuar dhe të shqetësuar për kushtet e jetesës në banesat e reja.

Disa prej banorëve të Valiasit, zonës së shpallur për rindërtim dhe zhvillim të detyruar me vendim nr. 22/2020, kanë kontaktuar redaksinë tonë dhe na kanë ftuar për të parë më nga afër apartamentet dhe punimet e bëra në to. Ata shprehen se janë të pakënaqur mbi mënyrën e shpërndarjes së apartamenteve. Ka ndër ta që hedhin dyshime për ndarje jotransparente dhe të bëra “me njohje dhe me fuqi”. Të tjerë kanë pakënaqësi mbi cilësinë e punimeve të bëra. Të gjithë shprehen se ankesat e tyre pranë bashkisë Kamëz nuk jane mirëpritur, përkundrazi, u është kërkuar ‘mirënjohje’ pasiqë u kanë falur shtëpi të reja. Rrjedhimisht, mbi ‘gjënë e falur’ nuk ke të drejtë të kesh pretendime.

Unë bërtita JO

Mbrëmjen e djeshme, qindra qyetare/ë u mblodhën në Sheshin “Nënë Tereza” në solidaritet me vajzën 11-vjeçare të përdhunuar në Prishtinë. Pas manifestimeve në Prishtinë dhe Shkup, në kryeqytet u marshua me thirrjen “Unë Bërtita Jo”.

Nëpërmjet pankartave, shumë prej protestuesëve zgjodhën të shprehnin reagimin e tyre ndaj këtij rasti të radhës ndaj vajzave e grave, ndërsa në fjalët e mbajtura iu mëshua përsëri thirrjes për edukim seksual dhe dënim të shtuar ndaj autorëve të këtyre krimeve.

“Edukoni çunat”, “Mos më prek”, ” 7 orë, 5 djemë, vajza 11 vjeç” ishin disa nga thirrjet e tjera që shoqëruan marshimin.

Ditët e bjeshkimit në Gjoçaj

Stani i Ademit shtrihet në një lëndinë malore me lisa të rinj dhe tokë e lagësht. Burimi i ftohtë i ujit brenda stanit e mban atë të fresket edhe në mesditë gushti. Ne na bie të ecim gjatë me të duke na pri shtigjeve. E pyesim herë pas here, me frymë të mekur nga ngjitjet nëse është lodhë. ‘Jo ore, hiç fare’ – na përgjigjet prerazi. E pyesim se çfarë e mban kaq në formë dhe ai na e kthen, po aq prerë: “Në formë më mban vendi këtu, natyra, klima, ajri shumë i pastër, ujë i kristaltë. Asht ujë kurues, këto na mbajnë në formë, ky vend.”. Prin i pari grupin prej dhjetë vetash, të gjithë më të rinj se ai. Kur i vonohemi rrugës, pak nga lodhja, pak nga joshja për të fotografuar çdo copë toke që shkelim, pak nga hutimi nëpër mjedra e boronica, na thërret ‘Hajdeni, rinia’- ndërkohë ‘rinia’ tërheq këmbët pas tij.

Shteti të vret

Mijëra qytetarë u mblodhën sot për të kërkuar dorëheqjen e ministrit Çuçi, ministres Kumbaro, Drejtorit të Përgjithëm të Policisë Nano dhe pati ndër protestues që kërkuan edhe rrëzimin e qeverisë. Humbja e jetës së 7-vjeçares në bregdetin e Himarës është pasojë e politikave të kësaj qeverie sipas protestuesëve, ndaj edhe përgjegjësit duhen ndëshkuar. Shumë prej qytetarëve kishin marrë fëmijët më vete, si për të treguar që ishin aty për ta, për të ardhmen e sigurtë të tyre.

Protestuesit u mblodhën përballë Ministrisë së Brendshme, nga ku nisën më tej marshimin drejt Kryeministrisë, ku gjithashtu ndezën qirinj dhe thirrën për drejtësi dhe marshimi u mbyll në Bulevardin “Dëshmorët e Kombit”, në ballë të Presidencës. Përveç ndezjes së qirinjve, qytetarët patën përgatitur edhe pankarta të ndryshme me mesazhin kryesor, “Shteti të vret”.

Liria s'është krim, vjedhja po

Dhjetra gazetarë u mblodhën poshtë zyrës së kryeministrit për të shprehur solidaritet me gazetarin Klevi Muka, të cilit Edi Rama i vendosi masën e riedukimit. Sjellja e vazhduar denigruese e Ramës ndaj gazetarëve pati shpërfaqjen e radhës para disa ditësh kur ai “dënoi” Mukën për 3 muaj me moslejim në konferencat e tij, ashtu siç ka bërë dhe përpara disa kohësh me kolegen e tij, Ambrozia Meta. Gazetarët në fjalën e përbashkët të mbajtur bënë thirrje për ndalim të qasjes së gabuar të kreut të qeverisë ndaj tyre.

Me akte simbolike si mbulimi i gojës dhe me pankarta, “Liria s’është krim, vjedhja po” një ndër to, ata kërkuan respektimin e profesionit të tyre dhe lirisë për të ushtruar të drejtat që u takojnë.

Kjo është një pjesë e deklaratës së aktivisteve të Kolektivit Feminist, që sot ndërmorën një aksion në mbështetje të vajzës 20-vjeçare që ra pre e dhunës të shumëanshme pas zbulimit të një lidhje jashtëmartesore.

Ndonëse të pakta në numër aktivistet udhëtuan drejt Librazhdit për të treguar se ky rast është një nga rastet e radhës që dëshmojnë dhunën sistematike ndaj vajzave dhe për të tubuar pafajësinë e vajzës së dhunuar. Tek qytetarët e Librazhdit ky aksion ngjalli kureshtje por të paktë ishin ata që shprehën mendim rreth çështjes.

Nuk mban më ujë pilafi

Rikthehen protestat kundër rritjes së çmimeve në kryeqytet. Me moton “Nuk mban më ujë pilafi”, nëpërmjet rrjeteve sociale dhe takimeve me qytetarë, Organizata Politike thirri protestën e sotme.

Nafta që sot shitet 258 lekë, por edhe çmimet e produkteve të tjera duke përfshirë edhe ato të shportës që sa vijnë e rriten po

e bëjnë mbijetesën më të vështirë sipas qytetarëve dhe aktivistëve.

“Rama e pi një kafe ndoshta 500 lekë, kurse unë e kam pensionin 200 lekë në ditë”: tregoi një pensioniste në fjalën e saj përgjatë protestës. Ajo shtoi gjithashtu se nuk e kupton se çfarë presim ende si popull që nuk ngrihemi të kërkojmë një jetë dinjitoze.

Manifestimi nisi në sheshin “Skënderbej”, për tu pasuar nga një marshim drejt Kryeministrisë, ku protestuesit në fjalët e tyre ngritën problematikat dhe shqetësimet e tyre.

Aksion në Librazhd, Kolektivi Feminist: Solidaritet

“Ne jemi mbledhur sot në Librazhd, për të shprehur solidaritetin tonë me vajzën e re nga Librazhdi. Njëkohësisht, dënojmë dhunën e ushtruar ndaj saj dhe i rikujtojmë medias detyrën e saj informuese dhe qytetare. Në asnjë rrethanë, dhuna NUK miratohet dhe nxitet më tej, veçanërisht nga media.”

"Ulni çmimet", mijëra qytetarë në protestë përballë Kryeministrisë

Me dhjetra mijëra qytetarë të Tiranës dhe gjithë Shqipërisë kanë mbushur sot Bulevardin “Dëshmorët e Kombit” për të protestuar kundër rritjes së çmimeve. Kjo ishte dita e katërt e protestave që kanë nisur pas rritjes së vlerës së shitjes së karburantit këtë fillim Marsi. Manifestimi nisi në Sheshin “Skënderbeu”, nga ku mijëra qytetarë marshuan për tek godina e Kryeministrisë. Në ballë të tyre shpalosej banderola “Boll na vodhët”, thirrje-akuzë që i drejtohet klasës politike të 30 viteve që pas rënies së regjimit diktatorial.

Protestojmë për liri

“Protestojmë për liri”, me këtë thirrje kryesore gra e vajza marshuan sot në Ditën Ndërkombëtare të Gruas. Manifestimi i thirrur nga Kolektivi Feminist sot kishte si kërkesë themelore lirinë e gjithëkahshme të gruas.

Në fjalën e mbajtur në nisje të marshimit u bë thirrje për liri për të gjitha gratë kudo që ndodhen:

– Lirinë per të jetuar të sigurta një jetë pa dhunë;

– Lirinë për të thyer stereotipet gjinore;

– Lirinë për kushte të dinjitetshme pune dhe barazi në paga;

– Lirinë për të mos u diskriminuar në baza të racës, statusit ekonomik, identitetit gjinor, etnisë, moshës apo preferencave seksuale;

– Lirinë për një jetë pa luftë dhe shtypje;

– Lirinë për të pushuar dhe për t’u kujdesur për veten;

– Lirinë për t’u organizuar në sindikata, kolektive e grupime komunitare;

– Lirinë për të qënë vetvetja;

– Lirinë për të menduar dhe vepruar;

– Lirinë për të imagjinuar dhe ndryshuar veten dhe botën;

– Lirinë për të dashuruar këdo.

Marshimi nisi tek sheshi “Skënderbeu” dhe u mbyll tek Kryeministria, para së cilës protestueset e akuzuan si institucion dhunues. Kabineti qeveritar me shumicë gra është farsë, sipas aktivistëve, me politikat që nuk shkojnë aspak përkrah luftës për barazi.

Banorët e Paskuqanit bllokojnë Unazën e Madhe

Devijimi i projektit të Unazës së Madhe i ka nxjerrë edhe këtë të martë banorët e Paskuqanit dhe Laprakës në rrugë. Ata bllokuan qarkullimin e mjeteve për një orë në kryqëzimin që lidh Unazën e Madhe me Bulevardin e Ri duke shkaktuar radhë të gjata.

Banorët e Laprakës treguan se në mënyrë jo zyrtare u kishin thënë që brenda 8 ditëve duhet të linin shtëpitë. Kërkesa ndaj ARRSh-së dhe institucioneve është të lënë lojërat dhe të marrin në konsideratë mundin e tyre.

Patronazhistët janë rikthyer sërish në funksion të qeverisë sipas banorëve dhe po mashtrojnë banorët që të mos marrin pjesë në protesta. Kërcënime ka pasur gjithashtu për ata që janë të punësuar në sektorin publik ose kanë familjarë të punësuar.

Në mbyllje të protestës, ata u kërkuan qytetarëve që të solidarizohen me ta gjithashtu dhe jo vetëm me ukrainasit.

HET ВОЙНЕ - JO LUFTË

Svitlana Luzina fizikisht ndodhet në Shqipëri, por mendjen e ka në Ukrainë. Bashkëshorti i saj është diplomat në Ambasadën e Ukrainës në vendin tonë, arsyeja pse është dhe këtu, por të birin e ka në Ukrainë e për të cilin po kujdesen prindërit e saj. Aksionin e solidaritetit me popullin e Ukrainës, të zhvilluar sot në Tiranë përballë Ambasadës Ruse, Svitlana e sheh si një akt shprese.

“Gjendja është e papërshkrueshme, bashkëshorti ende nuk arrin ta besojë që përplasjet kanë nisur. Jam shumë e shqetësuar për djalin tim tetë vjeçar dhe familjarët e mi edhe ndihem e paaftë të bëj asgjë, përderisa unë nuk shkoj dot atje dhe ata nuk munden të fluturojnë për këtu. Më jep shpresë solidariteti dhe kjo që po shoh sot këtu, më vjen mirë që njerëzit po reagojnë.”- tregoi Znj. Luzina teksa merrte pjesë në aksionin e sotëm.

Thirrja për tu mbledhur sot në shenjë solidariteti me Ukrainën erdhi nga rrjetet sociale dhe dhjetra njerëz u mblodhën duke shprehur kundërshtinë ndaj luftës.

“Ku do i çoni këto njerëz? A keni zemër?”

Kjo ishte thirrja e një prej banorëve të “5 majit” drejtuar parlamentarëve të Shqipërisë. Si çdo të enjte, prej javësh, edhe sot banorët e të gjitha zonave të Tiranës që preken nga investime publike protestuan përpara Kuvendit. Kërkesa për reagim veçanërisht i shkonte ministreve dhe deputeteve gra që hynin në godinë ndërkohë që Laureta Nikolli ende mbetet e izoluar në Drejtorinë e Përgjithshme të Policisë pas arrestimit më 22 shkurt. Liza Marku dhe gra të tjera protestuese kërkuan drejtësi dhe empati ndaj të shoqëruarëve, pasiqë janë arrestuar vetëm se mbrojtën pronën dhe se janë prindër e fëmijë të familjarëve që përpos shembjes së shtëpisë vuajnë edhe mungesën e të afërmëve.

Protestën e pasoi një marshim për tek Drejtoria e Përgjithshme të Policisë, ku edhe njëherë protestuesit bënë thirrje për lirimin e të arrestuarëve. Nesër pritet të mbahet seanca gjyqësore që përcakton masën për 5 banorët e shoqëruar.

22 fotografi të 22 shkurtit në lagjen "5 maji"

12 shtëpi u shemben dje për ti hapur rrugë ndërtimit të “Tirana Riverside” buzë lumit të Tiranës. Gjin Nikolli, Bekim Cerri dhe Laureta Nikolli janë disa nga protestuesit më të zëshëm të kauzës, shtëpitë e të cilëve u rrafshuan dje. Banorët rezistuan duke u përleshur me policinë, ndërkohë kjo e fundit përdori gazin lotësjellës dhe shoqëroi disa prej tyre në mënyrë që prishjet e shtëpive të vazhdonin.

Shtëpia që fotografon Orestia

Orestia Kapidani është fotografe. Krijimtaria e saj rrok kryesisht dy troje gjeografike: Halle dhe Tiranë. Në vitin 2019, bëhet pjesë e ekspozitës “Shtatë fotografë shqiptarë. Një rezidencë” në Muzeun Kombëtar të fotografisë „Marubi“ në bashkëpunim me ArtHouse në Shkodër. Në këtë ekspozitë, ajo shpërfaq për publikun jetën e një lagjeje periferike ku jetojnë pakicat rome dhe egjiptiane, brenda qytetit të Shkodrës pas një gardhi i cili i ndan ata nga qytetarët e tjerë. Lentja nomade e Orestias ia del ta kapërcejë gardhin tashmë sedentar të dallimeve të ashpra shoqërore në qytetin e saj të vendlindjes

Protesta e banorëve të Zall Gjocajt kundër HEC-eve.

Ndalini HEC-et! Lërini lumenjtë të rrjedhin! Protesta e banorëve të Zall Gjocajt (Mat) dhe zonave përreth kundër HEC-eve, më 16 nëntor 2019

Kamëz, referendumi i parë në nivel lokal.

Kamëz,30 janar 2017. Referendum i parë në nivel lokal, pas hyrjes në fuqi të ligjit per vetëqeverisjen vendore, me kerkesë hapjen e një qendre rinore prane Pallatit të Kulturës së këtij qytetit. Nga kjo nismë u mblodhen 1300 firma.