Erinda Isufaj | 14.08.2025 | nyje.al
Ditën e djeshme në sheshin “Skënderbej” në Tiranë u zhvillua një tjetër protestë në mbështetje të popullit palestinez, me thirrjen “Nga Tirana në Gaza, zëri i lirisë nuk ndalet!”. Tubimi i organizuar nga disa shoqata dhe forume islame, mblodhi qindra qytetarë e aktivistë që shprehën solidaritetin e tyre kundër genocidit që po ndodh në Gaza.
Një fjalën hapëse të protestës, Florjan Arapi shpjegoi sesi Izraeli, duke përdorur propagandë mohon vrasjet dhe urinë në Gaza, teksa po vret çdokënd që tenton të jetë zëri raportues i së vërtetës.
“Izraeli ka ndaluar të gjithë mediat e lira të raportojnë nga Gaza. Çdokush që raporton të vërtetën nga Gaza, qoftë gazetar, qoftë influencer, qoftë njeri i thjeshtë me celularin e tij, i rrezikohet seriozisht jeta. Para pak ditësh, Izraeli vrau pesë gazetarë duke e çuar numrin e gazetarëve të vrarë në 240. Refreni i turpshëm i përdorur nga ata është se njëri prej gazetarëve, – i cili ishte një gazetar i mirënjohur ndërkombëtarisht Anas Al-Sharif – u tha se ishte kreu i një celule të një organizate terroriste. Këto janë veprimet që bën shteti me ideologjinë ekstremiste raciste sioniste, i cili, njëlloj sikurse nazizmi e quan veten popull i zgjedhur dhe racë superiore, por që në të vërtetë veprojnë si djaj të vërtetë”.
Teksa Arapi tregon sesi vende të ndryshme në botë po anojnë gradualisht te Palestina, dhe po deklarojnë që do ta njohin atë si shtet, apo vende si Sllovenia që ka ndaluar importet vendosur embargo ndaj Izraelit, kryeministri shqiptar ka zgjedhur të jetë në krahun e errët të historisë.
“Shteti shqiptar ka intensifikuar marrëdhënient me shtetin e Izraelit në fushën e mbrojtjes dhe në fushën kibernetike. Shteti shqiptar me urgjencë po ndërton fabrika armësh dhe municionesh të cilat dyshohet se do të shërbejnë për të furnizuar luftën gjenocidiale të Izraelit. Në fushën e sigurisë kibernetike pothuajse gjjithçka u është dhënë apo po u jepet kompanive izraelite. Një shembull është e-Albania, e cila menaxhohet dhe është në dorën e një kompanie izraelite. Të gjitha këto veprime po ndodhin teksa në shtete perëndimore si Hollanda, e kanë cilësuar Izraelin rrezik për sigurinë kombëtare. […] Në vend që të dënohen krimet dhe genocidi i shtetit izraelit dhe të merren masa ndaj dimplomatëve të tij në Shqipëri, Rama ka zgjedhur të jetë në krahun më të errët të historisë. Të jetë në krahun e gjenocidit. Të jetë në krahun e vrasjes dhe të jetë në mbështetje të tyre.”
Genc Sejko, aktivist që ka mbajtur qëndrime pro-palestineze publikisht dhe në mënyrë të vazhdueshme pohoi se ajo çka po ndodh në Gaza është tashmë e dokumentuar dhe e konfirmuar që është gjenocid. Duke folur me ndjeshmërinë e përvojave historike shqiptare, si rasti i Çamërisë, ai pohoi se ne si popull e dimë dhe e ndjejmë atë që po kalon Palestina. Krahas thirrjes për solidaritet, edhe ai parashtroi kritikën e tij ndaj qeverisë shqiptare dhe kryeministrit Rama.
“Ndryshe nga vëllai im Flori, unë dua ta përgëzoj zotin kryeministër. Është e vështirë sot të gjesh në botë një njeri i cili është i gatshëm të dali në krah të atyre të cilët e gjithë bota po i denoncon si kriminel, si vrasës. Dhe këtë guxon ta bëjë vetëm kryeministri i vendit tim. Askush tjetër. Historia do ta mbajë mend ashtu siç vërtet e meriton, sepse ai nuk njeh dhembshuri. Sesi nuk njef dhembshuri – kryeministri i vendit tim – për Palestinën kur ai është përgjegjës për largimin e gati një milion shqiptarëve, një prej të cilëve jam edhe unë?!”
Beni Kizolli nga Kosova ju bashkua protestës duke shprehur solidaritet të plotë që vjen nga Prishtina duke thënë që ‘Gaza është zëri i ndërgjegjes njerëzore’. Avokatja Dorina Lamaj, në fjalën e saj theksoi se e drejta për liri e popullit palestinez është kauzë e jona dhe e gjithë botës. Aktivistë të grupimeve të tjera në Shqipëri, të pranishëm në protestë me banerat dhe pankartat e tyre rikujtuan vrasjet e gazetarëve në Palestinë, si shenjë solidariteti dhe si mënyrë për të dënuar aktet gjenocidiale ndaj tyre, ndaj fëmijëve, ndaj popullit palestinez.
Organizatorët e protëstës thanë që në krye të tubimit që ky ish manifestim i planifikuar të ndodhte qysh me datë 6 gusht, por për shkak të ndalimit të policisë nuk kishte ndodhur. Ata thanë që njoftimi me shkrim për organizimin e protëstës është bërë fillimisht për datën 6 gusht, por përgjigja që u është kthyer jashtë afateve ligjore ka qenë negative duke thënë se policia nuk mundet të angazhohet në mbarëvajtjen e protestës për shkak të ngarkesës me turizmin. Organizatorët protestues theksuan se ky reagim i pabazuar ligjor dhe që cënon të drejtën kushtetuese të protestës, nuk ishte gjë tjetër veçse shenjë sesi shteti shqiptar kërkon të pengojë dhe t’i pamundësojë organizmet pro-palestineze.
Ngjashëm ndodhi dhe në këtë protestë, ku pavarësisht njoftimit për marshim nga sheshi kryesor në rrugën e Kavajës, kordoni policor me mbi 50 trupa nuk lejoi në asnjë mënyrë kalimin e paqtë të protestuesve. Në momente tensionimi dhe insistimi nga protestuesit, të vendosur për të mos e mbyllur tubimin në heshtje, brohoritën dhe kundërshtuan haptazi këtë vendim arbitrar. Disa protestues ngritën pankarta dhe flamuj palestinezë drejt policisë, duke e bërë të qartë se qëllimi i tyre ishte të marshonin në mënyrë paqësore. Për disa minuta , situata mbeti e nderë, derisa forcat e rendit krijuan një kordon për të shpërndarë protestuesit, të cilët vazhduan thirrjet e tyre edhe gjatë largimit.
