{"id":23489,"date":"2024-07-13T10:49:07","date_gmt":"2024-07-13T08:49:07","guid":{"rendered":"https:\/\/nyje.al\/?p=23489"},"modified":"2024-07-13T17:42:55","modified_gmt":"2024-07-13T15:42:55","slug":"grate-e-kruscices-per-shushicen-aksioni-i-radhes-kunder-ujesjellesit-qe-le-pa-uje-37-fshatra","status":"publish","type":"post","link":"https:\/\/nyje.al\/sq\/grate-e-kruscices-per-shushicen-aksioni-i-radhes-kunder-ujesjellesit-qe-le-pa-uje-37-fshatra\/","title":{"rendered":"Grat\u00eb e Kru\u0161\u010dic\u00ebs p\u00ebr Shushic\u00ebn, aksioni i radh\u00ebs kund\u00ebr uj\u00ebsjell\u00ebsit q\u00eb l\u00eb pa uj\u00eb 37 fshatra"},"content":{"rendered":"

Fotolajm | 13.06.2024 | nyje.al<\/span><\/strong><\/span><\/p>\n

Fushata n\u00eb mbrojtje t\u00eb Shushic\u00ebs pati dje aksionin komunitar t\u00eb radh\u00ebs. Banor\u00eb t\u00eb fshatrave t\u00eb prekura nga projekti infrastrukturor, bashk\u00eb me grat\u00eb e Kru\u0161\u010dic\u00ebs nga Bosnja Hercegovina, si dhe aktivist\u00eb e gazetar\u00eb, p\u00ebrfaq\u00ebsues t\u00eb organizatave dhe avokat\u00eb t\u00eb p\u00ebrfshir\u00eb n\u00eb \u00e7\u00ebshtje ligjore-mjedisore shpalos\u00ebn edhe nj\u00ebher\u00eb parull\u00ebn \u201cSave our Shushica\u201d.<\/span><\/p>\n

Thirrja p\u00ebr mbrojtjen e nj\u00eb prej deg\u00ebve t\u00eb Vjos\u00ebs, pjes\u00eb e Parkut Komb\u00ebtar shpallur n\u00eb vitin 2023, vjen prej rrezikut real q\u00eb po i kanoset k\u00ebtij burimi prej nd\u00ebrtimit t\u00eb rrjetit t\u00eb uj\u00ebsjell\u00ebsit p\u00ebr qytetin e Himar\u00ebs. Banor\u00ebt e 37 fshatrave t\u00eb prekur nga ky projekt prej muajsh dhe n\u00eb m\u00ebnyra t\u00eb ndryshme e kan\u00eb kund\u00ebrshtuar at\u00eb duke argumentuar q\u00eb pasojat p\u00ebr jet\u00ebn e tyre, p\u00ebr lumin dhe p\u00ebr flor\u00ebn e faun\u00ebn do t\u00eb ishin t\u00eb pakthyeshme dhe aspak t\u00eb justifikueshme. Revolta e banor\u00ebve \u00ebsht\u00eb e madhe teksa shtrojn\u00eb se projekti \u00ebsht\u00eb investim kryesisht p\u00ebr turizmin masiv, duke p\u00ebrjashtuar nevojat e komunitetit lokal dhe mund\u00ebsit\u00eb e zhvillimit t\u00eb turizmit t\u00eb q\u00ebndruesh\u00ebm.<\/span><\/p>\n

N\u00eb shenj\u00eb solidariteti, dhe p\u00ebr t\u00eb treguar q\u00eb \u00e7\u00ebshtja e lumit \u00ebsht\u00eb jetike, po aq edhe nj\u00eb nd\u00ebr p\u00ebrbashkuesit m\u00eb t\u00eb fort\u00eb t\u00eb rezistencave n\u00eb rajon e kudo n\u00eb bot\u00eb, grat\u00eb e guximshme t\u00eb Kru\u0161\u010dic\u00ebs iu bashkuan dje banor\u00ebve t\u00eb Ku\u00e7it dhe Brataj. T\u00eb dalluara nd\u00ebrkomb\u00ebtarisht p\u00ebr vendosm\u00ebrin\u00eb e tyre duke bllokuar p\u00ebr m\u00eb shum\u00eb se 300 dit\u00eb terrenin p\u00ebr nd\u00ebrtimin e hec-it n\u00eb fshatin e tyre, grat\u00eb e Kru\u0161\u010dic\u00ebs jan\u00eb b\u00ebr\u00eb simbol rezistence p\u00ebr ujin, lumin dhe t\u00eb mirat e p\u00ebrbashk\u00ebta. Ato i komunikuan banor\u00ebve r\u00ebnd\u00ebsin\u00eb e rezistenc\u00ebs, duke ftuar grat\u00eb e zon\u00ebs p\u00ebr t\u2019u bashkuar edhe m\u00eb shum\u00eb n\u00eb num\u00ebr n\u00eb krah t\u00eb burimit t\u00eb Shushic\u00ebs.<\/span><\/p>\n

Plani i nd\u00ebrtimit t\u00eb uj\u00ebsjell\u00ebsit p\u00ebr Himar\u00ebn, n\u00eb nj\u00eb gjat\u00ebsi prej 17.3 km, devijon burimin, duke shkelur haptazi edhe parashikimet ligjore t\u00eb cilat e mbrojn\u00eb k\u00ebt\u00eb zon\u00eb si pjes\u00eb t\u00eb Parkut Komb\u00ebtar. Nj\u00eb vit prej se qeveria shqiptare u zotua nd\u00ebrkomb\u00ebtarisht p\u00ebr ruajtjen e Vjos\u00ebs, duke e shpallur Park Komb\u00ebtar, situata n\u00eb terren dhe trajtimi faktik i burimeve natyrore dhe parqeve komb\u00ebtare rezulton t\u00eb jet\u00eb e p\u00ebrkund\u00ebrt. Diku nj\u00eb hec, diku nj\u00eb projekt infrastrukturor n\u00eb sh\u00ebrbim t\u00eb investimeve strategjike rrezikon dhe kanos parqet komb\u00ebtare, teksa po aq institucionet po rrisin presionet p\u00ebr t\u00eb shtypur, kriminalizuar dhe shuar protestat dhe kund\u00ebrshtit\u00eb komunitare.<\/span><\/p>\n

Teksa banor\u00ebt zotohen p\u00ebr vazhdim t\u00eb rezistenc\u00ebs deri n\u00eb fitore, ka marr\u00eb udh\u00eb procesi gjyq\u00ebsor n\u00eb Gjykat\u00ebn Administrative t\u00eb Lushnj\u00ebs p\u00ebr ta kund\u00ebrshtuar edhe n\u00eb rrug\u00eb ligjore k\u00ebt\u00eb projekt. Iniciuar nga banor\u00ebt dhe organizata Eco-Albania, dhe t\u00eb p\u00ebrfaq\u00ebsuar nga avokat\u00ebt e qendr\u00ebs ligjore Res Publica, procesi gjyq\u00ebsor \u00ebsht\u00eb nj\u00eb tjet\u00ebr l\u00ebvizje komunitare nga i cili pritet drejt\u00ebsi.<\/span><\/p>\n